Boss GT 1000
GT-1000-ն իր ձայնային որակով և երաժշտական արտահայտչականությամբ նոր փուլ է բացում ուժեղացուցիչներ ու էֆեկտներ մոդելավորող պրոցեսորների համար։ Այս բարձրակարգ սարքում առաջին անգամ ներկայացվել է AIRD (Augmented Impulse Response Dynamics) տեխնոլոգիան, որը ստեղծվել է BOSS-ի տասնամյակների հետազոտությունների արդյունքում։ Այն աշխատում է գերարագ DSP շարժիչով, 32-բիթանոց անալոգաթվային ու թվաանալոգային փոխակերպմամբ, 32-բիթանոց լողացող ստորակետով մշակմամբ և ամբողջ շղթայում 96 կՀց նմուշառմամբ։ GT-1000-ը շարունակում է զարգանալ ներկառուցված ծրագրակազմի թարմացումներով՝ ստանալով նոր ուժեղացուցիչներ և էֆեկտներ, բաս կիթառի աջակցություն ու օգտատերերի առաջարկած այլ բարելավումներ։ BOSS-ի ճանաչված Tube Logic մոտեցման վրա հիմնված AIRD համակարգը թվային կիթառային պրոցեսորին հաղորդում է արտահայտիչ արձագանք և կիրառման լայն ճկունություն։ AIRD ուժեղացուցիչներն արձագանքում են իսկական լամպային ուժեղացուցիչների պես՝ ապահովելով ներշնչող զգացողություն և տեմբրային բնական դինամիկա, որը նախկինում դժվար էր ստանալ թվային պրոցեսորով։ AIRD Output Select-ի ընտրանքները թույլ են տալիս նույնքան լավ հնչել ամենատարբեր համակարգերով՝ սովորական կիթառային ուժեղացուցիչից մինչև ամբողջ հաճախականային տիրույթը վերարտադրող համակարգ։ GT-1000-ն ունի նաև ժամանակակից BOSS էֆեկտների մեծ ընտրություն, ազդանշանը տարբեր ուղիներով ուղղորդելու և իրական ժամանակում կառավարելու լայն հնարավորություններ։ Ներկառուցված Bluetooth®-ով և BOSS Tone Studio հավելվածով կարող եք բջջային սարքից անլար խմբագրել տեմբրները, նշանակել կառավարիչների գործառույթները և դասավորել պրեսեթները։ Կոկիկ պրոֆեսիոնալ կառուցվածքի մեջ տեղավորված այս մեծ հզորությունը նոր արտահայտչամիջոցներ է բացում թե՛ կիթառահարների, թե՛ բաս կիթառահարների համար։

AIRD՝ նոր մոտեցում ուժեղացուցիչների թվային մոդելավորմանը
GT-1000-ի հիմքում BOSS-ի նորարարական AIRD տեխնոլոգիան է, որը բացում է նախկինում անհասանելի երաժշտական հնարավորություններ։ Հայտնի Katana, Waza և Blues Cube ուժեղացուցիչների հիմքում ընկած Tube Logic հայեցակարգի վրա կառուցված AIRD-ը բարձրացնում է ուժեղացուցիչների մոդելավորման կատարողականությունը, ճկունությունն ու գործնական հարմարությունը։ Կիթառահարների սիրած լամպային ուժեղացուցիչները նվագին արձագանքող, արտահայտիչ երաժշտական գործիքներ են, որոնց ամբողջական վարքագիծը գերազանցում է առանձին բաղադրիչների հատկությունների գումարը։ Tube Logic նախագծման սկզբունքը վերարտադրում է հենց այդ փոխազդեցությունը և հաջողությամբ կիրառվել է ամբողջական կիթառային ուժեղացուցիչներում։ GT-1000-ի նման պրոցեսորում նույն մոտեցումը կիրառելն ավելի բարդ է․ երաժիշտներն այն միացնելու են տարբեր արտաքին ուժեղացման համակարգերի, որոնցից յուրաքանչյուրը ձայնին հաղորդում է իր բնույթը։ BOSS-ը մշակել է AIRD-ը՝ այս խնդիրը լուծելու համար։ Մանրակրկիտ մշակված մեթոդները պահպանում են GT-1000-ի յուրահատուկ երաժշտական արձագանքը ցանկացած համակարգում։



